हरिना देवी कामी

हरिना देवी कामी नेपाली काङ्ग्रेसबाट समानुपातिकतर्फ प्रतिनिधिसभा सदस्य हुन्। उनको चयन दलित, महिला समूहबाट भएको हो। ३७ वर्षीया हरिना कामीको जन्म डडेल्धुराको गन्यापधुरा गाउँपालिकामा भएको हो भने हाल उनको कर्मघर परशुराम नगरपालिका–१२ तुलाभाडीमा रहेको छ। सामान्य ग्रामीण परिवेश, आर्थिक अभाव र सामाजिक विभेदका बीच हुर्किएकी उनले १० कक्षासम्म मात्र औपचारिक शिक्षा हासिल गर्न सकिन्। सानै उमेरमा विवाह भएपछि उनको सुरुवाती जीवन अन्य ग्रामीण महिलाहरूझैँ घाँसदाउरा, मेलापात र खेतीपातीमै बितेको थियो। तर, समाजमा व्याप्त दलित र महिलामाथिको असमानतालाई नजिकबाट देखेपछि उनमा सामाजिक परिवर्तनका लागि केही गर्नुपर्छ भन्ने सोच पलायो र उनले महिला समूह तथा कृषि सहकारीमार्फत गाउँका महिलाहरूलाई आत्मनिर्भर बनाउने अभियान सुरु गरिन्।