बिधुशी राणा

बिधुशी राणा राष्ट्रिय स्वतन्त्र पार्टीबाट समानुपातिकतर्फ प्रतिनिधिसभा सदस्य हुन्। उनको चयन खस आर्य, महिला समूहबाट भएको हो। बिधुशी राणाको व्यावसायिक यात्रा बैंकिङ क्षेत्रबाट सुरु भएको हो। उनले काठमाडौँको सेन्ट मेरीबाट विद्यालय शिक्षा र भारतको बैंग्लोरबाट उच्च शिक्षा पूरा गरेपछि शंकरदेव क्याम्पसबाट 'बिजनेस एडमिनिस्ट्रेसन' मा स्नातक गरिन्। वि.सं. २०५७ मा उनका ससुरा नूरप्रताप जंगबहादुर राणाले कुमारी बैंक स्थापना गरेपछि विदुषीले त्यहाँ मार्केटिङ तथा ब्रान्ड म्यानेजरका रूपमा आफ्नो करियर थालेकी थिइन्। झण्डै ८ वर्ष बैंकमा काम गरेर ब्रान्च म्यानेजरसम्म बनेकी उनले पछि छोराछोरीको पालनपोषणका लागि १० वर्ष जागिरबाट विश्राम लिएकी थिइन्। पारिवारिक जिम्मेवारी पूरा गरेपछि उनले केही समय आफ्नै ट्राभल एजेन्सी र आईटी कम्पनी पनि सञ्चालन गर्ने प्रयास गरिन्।