टीका संग्रौला

टीका संग्रौला राष्ट्रिय स्वतन्त्र पार्टीबाट समानुपातिकतर्फ प्रतिनिधिसभा सदस्य हुन्। उनको चयन खस आर्य, महिला, पिछडिएको क्षेत्र समूहबाट भएको हो। पूर्वी पाँचथरमा जन्मिएर झापामा हुर्किएकी ३३ वर्षीया टीका संग्रौला (ज्वाला संग्रौला) हालै राष्ट्रिय स्वतन्त्र पार्टी (रास्वपा) बाट समानुपातिक सांसद निर्वाचित भएकी छन्। "अन्याय सहन नसक्ने" विद्रोही स्वभावकी ज्वालाको पहिचान एउटा प्रखर सामाजिक अभियन्ताको रूपमा रहेको छ। अछामका हिमाल उपाध्यायसँगको वैवाहिक सम्बन्धपछि उनी सुदूरपश्चिमको "बुहारी" बनेकी हुन् र सोही आधारमा उनले पिछडिएको क्षेत्रको क्लस्टरबाट संसद्मा प्रतिनिधित्व गर्ने अवसर पाएकी हुन्। सडकको धुलो, प्रहरीको हिरासत र सामाजिक सञ्जालको आन्दोलन हुँदै उनी अहिले देशको सर्वोच्च नीति निर्माण तहमा पुगेकी छन्।