मदन कृष्ण श्रेष्ठ

मदन कृष्ण श्रेष्ठ नेपाली काङ्ग्रेसबाट समानुपातिकतर्फ प्रतिनिधिसभा सदस्य हुन्। उनको चयन आदिवासी जनजाति, पुरुष, अपाङ्गता समूहबाट भएको हो। श्रेष्ठको जीवन सुरुदेखि नै चुनौतीपूर्ण रहेको थियो। ६ महिनाको उमेरमा बुवा गुमाउनुभएका उहाँलाई ७ महिनाको उमेरमा टाइफाइड भएपछि पोलियो देखियो, जसका कारण उहाँको खुट्टामा समस्या आयो। शारीरिक अशक्तताका बावजुद उहाँले हिम्मत नहारी १३ वर्षको उमेरदेखि नै विद्यार्थी राजनीतिमा पाइला चाल्नुभयो। विगत चार दशकदेखि नेपाली कांग्रेसको संगठनमा सक्रिय श्रेष्ठले २०४६ सालको जनआन्दोलन ताका जेल जीवन पनि भोग्नुभयो। उहाँले भक्तपुर कांग्रेसको कोषाध्यक्षदेखि लिएर लगातार दुई कार्यकाल क्षेत्रीय सभापतिको जिम्मेवारी समेत सम्हालिसक्नुभएको छ। लामो समयको प्रतीक्षापछि उहाँ कांग्रेसको १४औँ महाधिवेशनबाट केन्द्रीय सदस्यमा निर्वाचित हुनुभएको थियो, जसलाई उहाँले आफ्नो राजनीतिक जीवनको महत्वपूर्ण उपलब्धि मान्नुहुन्छ।

अन्य नाम: मदनकृष्ण श्रेष्ठ