एलिजा गुरुङ

एलिजा गुरुङ राष्ट्रिय स्वतन्त्र पार्टीबाट समानुपातिकतर्फ प्रतिनिधिसभा सदस्य हुन्। उनको चयन आदिवासी जनजाति, महिला समूहबाट भएको हो। एलिजा गुरुङ उत्तरी गोरखाको विकट क्षेत्र धार्चे-२ को केरौजा गाउँमा जन्मिएकी हुन् । उक्त हिमाली भेगको कठिन भूगोलमा हुर्केकी उनले स्थानीय केरौजा माध्यमिक विद्यालयबाट माध्यमिक तह र मनाङको थोजो क्याम्पसबाट प्लस टु उत्तीर्ण गरिन् । २०७२ सालको भूकम्पपछि आफ्नो गाउँ फर्किएर एलिजा केयर नेपालमा सोसल मोबिलाइजरको रूपमा काम सुरु गरिन् । भूकम्प प्रभावित क्षेत्रमा राहत वितरण, सचेतना कार्यक्रम सञ्चालन, कम्बल तथा सोलार उपकरण वितरण जस्ता कार्यमा सक्रिय रहेकी उनले पद्धति विकास सेवा केन्द्र र एकीकरण नेपाल जस्ता संस्थामा चार वर्षसम्म सोसल मोबिलाइजरको भूमिका निर्वाह गरिन् । २०१९ मा एसके इन्टरटेनमेन्टद्वारा आयोजित 'मिस आदिवासी जनजाति'को उपाधि जितेर राष्ट्रिय स्तरमा चर्चा कमाइन् ।