आकृति अवस्थी

आकृति अवस्थी राष्ट्रिय स्वतन्त्र पार्टीबाट समानुपातिकतर्फ प्रतिनिधिसभा सदस्य हुन्। उनको चयन खस आर्य, महिला समूहबाट भएको हो। डडेलधुराको अमरगढी नगरपालिका-५, सेलागाउँकी आकृति अवस्थी राष्ट्रिय स्वतन्त्र पार्टी (रास्वपा) बाट प्रतिनिधिसभाको समानुपातिक सांसद बनेकी छन्। उनी एक सामान्य परिवारबाट आएकी हुन् र यसअघि गैरसरकारी संस्थामा सामाजिक कार्यमा सक्रिय थिइन्। उनको जीवनमा २३ भदौको घटनाले ठूलो मोड ल्यायो। उक्त दिन काठमाडौंमा भएको 'जेन-जी' (Gen-Z) आन्दोलनका क्रममा उनका भाइ मुकेश अवस्थी प्रहरीको गोली लागेर गम्भीर घाइते भएका थिए। लामो उपचारपछि मुकेशले आफ्नो बायाँ खुट्टा गुमाउनुपर्‍यो। रास्वपाले आन्दोलनका घाइते परिवारका सदस्यलाई प्राथमिकता दिने नीति अनुरूप आकृतिलाई संसद्मा पुर्‍याएको हो।