सुधन गुरुङ

सुधन गुरुङ एक नेपाली राजनीतिज्ञ तथा सामाजिक अभियान्ता हुन् जो नेपालको २७औँ गृहमन्त्रीको रूपमा सेवा गरे । उनी गैर-सरकारी संस्था हामी नेपालका संस्थापक र संयोजक पनि हुन्। उनी नेपालमा जेनजी आन्दोलनपछि युवा आन्दोलनको एक प्रमुख व्यक्तिको रूपमा अगाडि आएका थिए। उनले जेनजी आन्दोलनपछि उनले राष्ट्रपति र प्रधानसेनापतिसँग व्यापक वार्तामा भाग लिएका थिए जसको फलस्वरूप पूर्व प्रधानन्यायाधीश सुशीला कार्कीलाई अन्तरिम प्रधानमन्त्रीको रूपमा चयन गरिएको थियो भने संसद विघटन गरी मध्यावधि निर्वाचनको मार्ग प्रशस्त भएको थियो। २०८२ भदौ २९ को रात, गुरुङले अन्तरिम प्रधानमन्त्री कार्कीको राजीनामाको माग गर्दै विरोध प्रदर्शनको नेतृत्व गरेका थिए। उनले प्रधानमन्त्रीले सल्लाह नगरी मन्त्रिपरिषद् विस्तार गरेको आरोप लगाएका थिए। उनले २०८२ को प्रतिनिधि सभा निर्वाचनमा गोरखा १बाट राष्ट्रिय स्वतन्त्र पार्टीको उम्मेदवारको रूपमा चुनाव लडेर नेपाली काङ्ग्रेसका निकटतम प्रतिद्वन्दी प्रेमकुमार खत्रीलाई १४,४९८ मतान्तरले पराजित गर्दै सांसदको रूपमा निर्वाचित भएका थिए । २०८२ चैत १३ मा, उनलाई प्रधानमन्त्री बालेन शाहको नेतृत्वमा रहेको सरकारद्वारा नेपालको गृहमन्त्रीको रूपमा नियुक्त गरिएको थियो । २०८३ वैशाख ९ मा, बढ्दो विवाद र सार्वजनिक दबाबका कारण नैतिक जिम्मेवारी स्वीकार गर्दै उनले आफ्नो पदबाट राजीनामा दिए । उनले जम्मा २६ दिन गृहमन्त्रीको पदमा बसेर शासन गरेका थिए ।