अम्बिका देवी संग्रौला

अम्बिका देवी संग्रौला श्रम संस्कृति पार्टीबाट समानुपातिकतर्फ प्रतिनिधिसभा सदस्य हुन्। उनको चयन खस आर्य, महिला समूहबाट भएको हो। तेह्रथुमको हेदापमा २०३१ सालमा जन्मिएकी अम्बिकादेवी संग्रौलाको बाल्यकाल झापामा बितेको थियो। लामो समयसम्म धरानलाई कर्मथलो बनाएकी उनी करिब १८ वर्षदेखि जुत्ता-चप्पल र कस्मेटिक व्यवसायमा संलग्न एक सामान्य उद्यमी र गृहिणी थिइन्। उनको जीवनमा निर्णायक मोड तब आयो जब धरानका मेयर हर्क साम्पाङले सुरु गरेको 'श्रमदान अभियान'मा उनी जोडिन पुगिन्। राजनीतिमा खासै चासो नभएकी उनी साम्पाङको कार्यशैली र श्रमप्रतिको सम्मानबाट प्रभावित भएर सामाजिक सेवामा होमिएकी हुन्। उनी २०८० सालमा 'स्वतन्त्र दिदीबहिनी समूह'को सह-सचिव र पछि 'श्रमसंस्कृति दिदीबहिनी समूह'को सचिव हुँदै श्रम संस्कृति पार्टीको केन्द्रीय सदस्यसम्म बनिन्।